بالصور انا حصل لي تحرش قصة احد الفتيات التي تعرضت للتحرش في العيد

بالصور انا حصل لي تحرش قصة احد الفتيات التي تعرضت للتحرش في العيد
عرضنا لكم اكثر من مرة فيديوهات وصورا تبين المضايقات والتحرشات التي تتعرض لها الفتيات في مصر وخاصة في مواسم الاعياد و الزحام والصور التي بينت ان المتحرشين من فئة عمرية قليلة القصة التالية هي لاحد الفتيات قامت بنشر قصتها علي صفحة كلنا خالد سعيد في خطوة جرئية منها ليتعرف الناس علي قصتها التي مرت بها وامواقف التي تعرض لها عندما ارادت عمل محضر ومنعها الناس وقالولها انها سوف تفضح نفسها بهذه الطريقة ولكنها اصرت وفوجئت برد الفعل الغريب عندما ذهبت لقسم الشرطة وطلبت عمل محضر تحرش قم بقرائة النوت كاملة التي نشرتها الفتاة وصرحت انه مسموح لاي حد بنشر النوت لتصل قصتها للناس جميعا  

انا حصل لى تحرش
by Sheren Acje on Sunday, August 19, 2012 at 1:30am ·
ببساطة كده ومش عارفة ارتب الكلام ...."انا حصل لى تحرش" كنت فاكرة الجملة دى بعيدة عنى ويمكن ميجيش عليا اليوم اقولها بس قلتها انهاردة الساعة 2 الظهر كنت في طريقى للبيت وواحد في الشارع جاى من بعيد وكالعادة ببص له عشان اتوقع هو ممكن يعمل ايه كنت عارفة انه هيعاكس وده اللى خلانى لما عدى ومتكلمش افضل ابص له ادور من ظهرى وانا بعدت عنه فمسك رجلى ضربته بايدى الفاضية وكنت عايزة اكمل عليه ضرب مسكنى من ايدى وزقنى ع الحيطه ووقعت على الارض مكنتش قادرة اجرى وراها قمت وجريت وراها كنت بصوت في الشارع واقول للناس : امسكوه لو سمحتم امسكوه لحد ما دخل شارع وعلى ناصية الشارع سلم على شاب كان واقف ولما لاقانى جايه اجرى وراها دخل الشارع واختفى فمسكت الولد اللى سلم عليه على اول الشارع وقلت له: ده صاحبك وانت عارفه لانه سلم عليك فقولى هو مين وساكن فين لحسن اقول ان انت اللى عملت كده قالى وانا مالى قلت له خلاص عايزة اعرف البنى ادام اللى عمل كده ( اسمه عادل وساكن في شارع عبد الخالق ربيع عند موقف المسلة الجديدة والشارع على ناصيته جامع )
دخلت الشارع وفضلت ازعق نزلوا شوية رجالة من الشارع والستات كانوا واقفين في الشبابيك وانا بزعق والناس تسألتى هو عادل ده عمل لك إيه؟ قلت لهم اتحرش بيا ....اتخضوا كده وواحد قالى ومين قالك انه ساكن هنا قلت لهم صاحبه اهو موجود .........راجل كبير يقولى : " ما خلاص يا بنتى انتى غاوية تفضحى نفسك استرى ع اللى حصل وعلى نفسك " قلت له: انا اللى استر على نفسى ليه انا اللى غلطت
يا جماعة انا مش هامشى من الشارع غير لما البنى ادام ده يجى ........ نزل لى شيخ الجامع يقولى يابنتى دول كلهم صيع ولسه سارقين من الجامع 50 الف جنية بتوع الموتى ....... قلت يا عم الشيخ انا مليش دعوة بالموتى ولا الاحياء انا ليا دعوة باللى حصل لى وانت رجل دين وافتكر اللى حصل لى ميرضيش ربنا .......يرد يقولى : يا بنتى بقولك انتهكوا حرمة الجامع .....قلت له : عليك نور بقى انا عايزة حقى وانت اقف خد حق حرمة الجامع
جه واحد كبير بقى ......" تعالى معايا" قلت له : معرفكش عشان اجى معاك " يرد الشيخ ويقولى : روحى معاه يا بنتى ده مسيحيى زيك .......بصت له باستغراب وقلت له : ليه هو اللى حصل لى ده مش ممكن يحصل مع اى بنت مسلمة؟؟؟؟؟ انا مش دى قضيتى عايزة البنى ادام ده لابلغ البوليس
والناس عملت بالمقولة : " قالوا للحرامى احلف "
رحت مع الشخص المسيحى ده للقسم لقيت سيادة البيه العسكرى قاعد ع الكرسى ورافع رجليه ع المكتب ( الكلام ده الساعة 2 الا ربع ) ومفيش ولا بنى ادام غيره
قلت له عايزة اعمل محضر .....محضر ايه يا انسة؟؟ تحرش حضرتك بص لى قوى وفضل يضحك خمس دقايق متواصلة .....كنت هاضربه بس الشخص اللى معايا منعنى اعمل كده وقالى كفاية كده تعالى هوصلك وروحت

حاجات ع الهامش كده:-
1) قد إيه حاجه مريحة إنك تقولى حصل لى تحرش ويكون جنبك ناس بتساندك لانه موقف صعب قوى مهم تقولى وناس تشارك بجد.
2) اول مكالمة جت لى بعد اللى حصل من إنسان بعتز بيه جداً وقالى جملة عبقرية " كل الرجالة اللى كانوا واقفين معاكى كان قدامهم فرصة يكونوا بنى ادامين ومعملوش كده" حقيقى اختاروا يكونوا حاجه غير كده
3) اتصلت بيا واحدة من اصحابى بتلومنى انى كتبت ده ع الفيس وولاد المدرسة يقروا الكلام ده عيب يعنى يعرفوا ان المدام بتاعتهم حصل لها كده . معنديش وصف ليها
4) وواحدة زميلتى دخلت الموضوع في السياسية وكتبت لى " مبروك:" وبعتت تقولى انا سعيدة ان ده بيحصل لك عشان انتى روحتى ابطلتى صوتك وجبتى مرسى تتستاهلى . معنديش وصف ليه برضه
5) من حق اى بنى ادام يعمل شير للنوت دى من غير ما يرجع لى
اخيراً : -
مش عايزة اسكت قولى اعمل إيه؟؟؟؟؟؟؟

 http://misrstars.com/vb/showthread.php?t=423650

 http://misrstars.com/vb/showthread.php?t=423650